La sede
L'Istitût Ladin Furlan al à la sô sede operative a Coder di Sedean (Ud) li di 'Cjase Turoldo', dulà che al è nassût l'innomenât poete e scritôr Pari David Maria Turoldo (1916-1992). La cjase, che e va daûr al stamp de tipiche cjase agricule furlane dal '700, e je stade fate sù ae fin dal '800 e metude a puest tal 1997 di bande dal Comun di Sedean e de Regjon Friûl-V.J. in graciis dai fonts europeans. Par antîc, la cjase e jere componude di une cusine al plan tiere, di dôs cjamaris al prin plan e di un grant solâr al ultin plan. Donade al Comun dal ultin proprietari e je rivade scuasit intate fintremai ai nestris dîs. De struture origjinarie a son stadis conservadis come che a jerin la cusine e la cjamare di Turoldo, mentri che il rest de struture al è doprât pes ativitâts culturâls.
