Fieste de Patrie

Di cetancj agns l’Istitût, in colaborazion cu lis Provinciis di Udin e di Pordenon, la Regjon Friûl-V.J., lis Diocesis di Gurize, Concuardie-Pordenon e Udin, l’Universitât dal Friûl e l’Ufici scolastic regjonâl, al met adun la “Fieste de Patrie dal Friûl”.
La manifestazion, ideade plui di 30 agns indaûr di Pre Checo Placerean, e celebre la nassite dal Stât patriarcjâl furlan dai 3 di Avrîl 1077. Une date une vore impuartante pe storie furlane parcè che – seont il storic Giancarlo Menis, autôr de Storie dal Friûl – e segne la costituzion di “un vast e compat teritori che al veve di sotstâ ae uniche jurisdizion feudâl dal Patriarcje. Intune peraule al vignive fondât chel principatus Italiae et Imperii, politic-eclesiastic, che al sancive une realtât social za consolidade mediant di un lunc procès storic e che, di lì indevant, par trê secui e mieç, e varês metût adun i furlans in formis simpri plui elevadis di vite civîl”.
Il clou des manifestazions si lu fâs ogni an, a rotazion, intun comun diviers des trê provinciis furlanis.

 

Va te Sezion di pueste