Didatiche

Un viaç tal cûr dai fruts

Racuelte di contis par furlan voltadis par talian di Franca Mainardis, ILF 2008

"Plui che un libri di contis al è une conte de vite". Cussì, te presentazion, e à descrivût chest libri par fruts Rosalba Perini. Il volum al è insiorât des ilustrazions di Flavia Caffi.

Un bosc cence colôrs

di Franca Mainardis (conte par fruts), ILF 2003

Une biele conte par fruts, cun ilustrazions di Flavia Caffi, par vicinâ i letôrs plui piçui ae lenghe furlane.

Une introduzion ae analisi matematiche

di Matteo Fogale e Emanuele Paolini, cuntune jentrade di Sergio Cecotti, ILF 2001

Chest libri - opare uniche intal so gjenar - al fronte in mût sintetic e doprant la lenghe furlane i argoments fondamentâi di un cors di analisi matematiche par students universitaris.

Bielscrivint (libris + video)

di Dorino Minigutti e Silvana Fachin Schiavi, ILF 1995

Si trate di un viaç fantastic tal mont de scriture par furlan. Promovût adun cu la Universitât di Udin, al è stât un dai prins imprescj multimediâi pe educazion bilengâl furlan-talian.

Storie

Telâr di storie dal Friûl

di pre Checo Placerean, ILF 1996

Un librut franc e sclet - come tal stîl dal autôr - sui principâi aveniments de storie dal Friûl. Un cuadri svelt e complet metût adun di un dai plui grancj pensadôrs e autonomiscj furlans.

L'ereditât di pre Checo Placerean

ats de cunvigne, Comun di Montenars 1996

Ce isal restât dal grant insegnament di Pre Checo? Intune cunvigne, metude adun a Montenârs a dîs agns de muart dal grant furlanist, si è cirût di fâ un prin belanç graciis al intervent di studiôs e scritôrs.

Lessicografie

Animâi nostrans e forescj

di Lionello Baruzzini e Angelo M. Pittana, ILF 2001

Un vocabolari straordenari par cognossi i nons di ducj i animâi par furlan, adun cul non sientific latin e la version taliane. Il libri al cjape dentri ancje une vore di fotografiis e tantis curiositâts.

Plantis nostranis e forestis

di Lionello Baruzzini e Angelo M. Pittana, Chiandetti 2000

Un imprest di ûs pratic e insiorât di cetantis fotografiis par cognossi i nons furlans des plantis cu la version ancje par italian e par latin. Tal libri si cjatin ancje cetantis informazions sul ûs des plantis inte tradizion furlane.

Dizionari dai sports olimpics

di Gotart Mitri, Chiandetti 1999

Publicât in ocasion dai zûcs olimpics di Sydney dal 2000, chest vocabolari al descrîf dutis lis dissiplinis e ducj i tiermins dai varis sports par furlan, cun traduzion ancje par talian e inglês.

La nomencladure des matematichis

di A. Pittana, G. Mitri, L. De Clara, ILF 1997

Al è stât il prin dizionari a tratâ in maniere organiche la terminologjie de matematiche par furlan. Il libri al cjape dentri ducj i principâi tiermins matematics dividûts par categoriis cu lis jentradis par furlan, talian e inglês.

Tradizions popolârs

Spjeli de anime furlane

Antologia della tradizione orale friulana di Achille Tellini, ILF 2006

Achille Tellini (1866-1938), naturalist, gjeolic, folclorist, esperantist, sagjist, docent e grant ricercjadôr des testemoneancis de tradizion furlane, al è l'autôr dal "Tesaur de lenghe furlane" di dulà che si è aurît par dâ a lis stampis, pe prime volte, chescj tescj de tradizion orâl furlane.

Sfueis - II volum

Memoria e ricerca storica, Comun di Sedean e ILF 2005

Un viaç intun Friûl che nol è plui mediant dai sueis che a jerin sparniçâts in tancj paîs de planure furlane. Il secont volum al cjape dentri une schirie di ricercjis une vore aprofondidis sui aspiets tecnics, sociâi, linguistics e storics peâts a l'ûs des aghis inte tradizion furlane.

Sfueis - I volum

Memoria e immagine, Comun di Sedean e ILF 2004

Un viaç intun Friûl che nol è plui mediant dai sueis che a jerin sparniçâts in tancj paîs de planure furlane. Il prin volum al propon une ricostruzion dai principâi sueis in graciis dai cuadris dal pitôr Otto D'Angelo e di une descrizion dal ambient e de societât di chê volte.

Poesie e narative

Amôr cence confin

di Giacomina De Michieli, Campanotto 2004

"Sens di partignince ae propie tiere, onestât, culture dal lavôr, volontât di tignî bot denant des maluseriis de vite, fuart leam cu la tradizion dai vons: inta chest lavôr leterari di Jacumine De Michieli nol mancje nissun dai elements di fonde dal mût di jessi dai furlans". (de Jentrade di William Cisilino)

Il timp al à alis

di Agnul di Spere, ILF 2001

La penultime racuelte di lirichis di un dai plui grancj poetis furlans: Agnul Di Spere, al secul Angelo Pittana (1930-2005). Lis poesiis a son voltadis ta chês altris lenghis ladinis di Lois Craffonara (ladin) e di Jean-Jacques Furer e Franz Monn (romanç) e par inglês di John R.L. Johnson.

Impressions, visions

di Agnul di Spere, ILF 1997

Un dai libris plui biei dal poete Agnul Di Spere, al secul Angelo Pittana (1930-2005), cu la version par francês curade di Jean-Jacques Furer.

Cerclis ta l'aghe

di Franca Mainardis, ILF 1996

Il percors interiôr di une poetesse dal dì di vuê, che e conte il so il mont, il so jessi, la sô tiere. Un viaç dilunc dai sintiments e lis confidencis di une autore in lenghe furlane che e à vût cetancj ricognossiments sedi in Patrie che fûr.

Soreli/Soleil (antologjie)

di varis autôrs, ILF 1994

Cheste e je une interessante racuelte di poesiis furlanis di varis autôrs voltadis in 9 lenghis. Un libri che al à puartât ator pe Europe la poesie di cjase nestre.