Al è vignût fûr il gnûf numar dal cuindisinâl dut par furlan "Il Diari" (te foto). Fra lis altris, il sfuei al fevele dal gnûf sît dal Istitût Ladin Furlan "Pre Checo Placerean", des ativitâts de ARLeF e al cjape dentri, come simpri, plusôrs servizis di cronache e di atualitât dongje dai apontaments cu lis variis rubrichis.

"Il Diari" si pues leilu ancje discjamant il pdf li di www.ildiari.eu.

Miercus ai 6 di Mai dal 2009 a lis 17.30 a Udin li de Sale Consiliâr de Provincie di Udin, l’Istitût Ladin Furlan “Pre Checo Placerean” al presentarà la gnove version dal sît internet de associazion www.istitutladinfurlan.it.
Al event a intervignaran Pietro Fontanini, President de Provincie di Udin, William Cisilino, President dal Istitût Ladin Furlan, Lorenzo Zanon, President de ARLeF e Arnaldo Baracetti, dal Comitât pe autonomie dal Friûl.
Il sît al ufrìs cuntune vieste grafiche cetant atrative une vore di informazions su lis ativitâts davueltis de associazion. Cun di plui al cjape dentri un archivi informatic dedicât a la vite e a la opare di Pre Checo Placerean che al sarà screât intant de presentazion.