I simbui nazionâi
La bandiere
La antighe steme de Patrie dal Friûl e je la acuile araldiche di aur in cjamp blâf. “La acuile – al scrîf Gianfranco Ellero in Il Friuli. Una Patria – arme uficiâl de Patrie e simbul unitari di dut il Friûl storic, e figurave intai sigjii dal Stât (inmò ben tignût chel di Marquart di Randeck), sui bêçs batûts dai patriarcjis (di Bertolt di Andechs, Volchêr, Otobon e Bertrant, par un esempli) e tes pituris sui mûrs (si viôt inmò chê su la puarte di S. Bartolomiu in borc Manin a Udin)”.
L’esempli plui innomenât e antîc di bandiere patriarcjâl al è metût in mostre tal Domo di Udin: al è un sflandorôs drap cuadrât di sede blave cun parsore une grande acuile di aur. Chest al fo cusît sù tal cjamis di lin blanc che al vuluçave il cuarp dal patriarcje Bertrant di Saint Geniès, restât su la sente di Aquilee dal 1334 al 1350 e copât intune vuaite plene di viamence metude adun di un trop di nobii furlans. Cemût che al testemonee chest esemplâr, alis displeadis, cjâf a man çampe di cui che al cjale, bec daviert e sgrifis rossis a caraterizin la aquile dal Stât furlan.
L’antîc simbul ancje in dì di vuê al è ricog nossût di ducj tant che la bandiere uficiâl dal Friûl. No va sconfondude cu la bandiere de istituzion dome aministrative clamade “Regione Friuli-Venezia Giulia”, che e à une divignince cetant plui resinte (1963) e dut un altri significât storic.
La lenghe
Il furlan al è une lenghe neolatine dal grup ladin. Tant che lenghe si è formât sù par jù ator dal an Mil e al à mantignût, vie pai secui, une origjinalitât particolâr che lu rint, ancjemò vuê, une vore diferent dal talian e di chês altris fevelis cjacaradis tes tieris confinantis (todesc, sloven e venit). Par antîc, in Friûl a jerin a stâ i Carnics, popolazion de çocje celtiche. Tal 181 prin di Crist il Friûl al fo cjapât dai Romans. Daspò de dominazion dai Langobarts e dai Francs, tal 1077 si costituì tant che Stât autonom, li che il podê lu veve il Patriarcje di Aquilee parie cuntun Parlament (il Parlament de Patrie dal Friûl). Tal 1420, il Friûl, gjave la Contee di Gurize, al fo concuistât dai Venezians che lu guviernarin, mantignint une cierte forme di autonomie, fin tal 1797, cuant che al lè sot dal domini de Austrie, daspò lade al mancul la Serenissime. Tal 1866, il Friûl (gjavade la part orientâl che e deventarà taliane tal 1919) al fo cjapât dentri tal Ream di Italie.
I prins documents par furlan a son dai secui XII e XIII, cuant che a comparissin ancje lis primis composizions poetichis. Di in chê volte, la produzion leterarie par furlan e je cressude di un continui, cun risultâts stilistics ancje di nivel alt (Ermes di Colorêt, Catarine Percude, Pier Paolo Pasolini). Cun di plui, tor dal secul XIX, si è svilupade une coinè leterarie codificade di tescj autorevui che ancje in zornade di vuê e rapresente un pont di riferiment impuartant pal procès di normalizazion lenghistiche. Il furlan al à a disposizion putrops dizionaris e tescj di caratar gramaticâl e al è studiât li des Universitâts di Udin, di Triest, di Praghe, di Mosche e di Lubiane. Fintremai des origjins la Glesie e à doprât cheste lenghe te liturgjie e te dutrine e, cualchi an indaûr, e à curât lis traduzions integrâls de Bibie, dal Lezionari e dal Messâl.
A fevelin par furlan sù par jù 600.000-650.000 di lôr in 178 comuns des provinciis di Gurize, Pordenon e Udin e in 7 comuns de provincie di Vignesie. Daûr des ricercjis sociolenghistichis, in Friûl il 52,2% dai intervistâts al capìs e al fevele cun regolaritât par furlan, il 20% al capìs ma al fevele ogni tant, il 19,9% al capìs ma cence cjacarâlu e il 2,6% no lu capìs e no lu fevele.
Il prin ricognossiment uficiâl de lenghe furlane al è dal 1996, cuant che e je stade fate buine la leç regjonâl 15/96. Cualchi an plui tart ancje il Stât talian al à ricognossût la minorance furlane cu la leç 482/1999, passe 50 agns daspò de aprovazion dal articul 6 de Costituzion ("La Republiche e tutele lis minorancis lenghistichis cun normis di pueste"). Di resint la Regjon e à fat buine une gnove leç organiche di tutele: la L.R. 29/2007.
La marilenghe e je doprade ancje tai media e in variis formis artistichis, fra chestis: leteradure, teatri, cine, musiche.
Il Parlament de Patrie dal Friûl
Il Parlament de Patrie dal Friûl al nassè des assembleis consultivis de nobiltât e dal clericât, clamadis dongje dal Patriarcje di Aquilee za dal XII secul par domandâ gnovis contribuzions in bêçs e soldâts. Ma fin dal imprin, dongje de nobiltât e dal clericât, si sentavin ancje i rapresentants dai Comuns.
Lis voris parlamentârs si davuelzevin in lenghe furlane. Il patriarcje al rapresentave il Stât feudâl, ven a stâi il "principatus Italiae et Imperii" istituît tal 1077; il Parlament al rapresentave la "universitas" furlane daprûf dal princip.
Za tal XIV secul il Parlament al jere deventât la plui grande assemblee legjislative, il plui grant tribunâl di apelazion aministratîf, rivant a controlâ il stes Patriarcje.
Al è dal sigûr un onôr par dutis lis istituzions civîls dal Friûl il fat di vê istituît, jenfri lis primis comunitâts de Europe, propit tal nestri teritori cheste forme origjinâl di rapresentance.